Obama, i shqetësuar për krizën në Europë

Presidenti Amerikan, Barack Obama shprehu shqetësim të thellë për qëndrueshmërinë e krizës europiane të borxheve sovrane dhe efekteve negative të saj në tregjet e financimit dhe në ekonominë reale globale. Ai tha se kjo krizë do të vazhdojë deri në momentin që do të ketë një plan konkret. Komentet e presidentit u bënë gjatë vizitës që po zhvillon në Australi.

"Ne nuk do të shikojmë qetësi në tregjet e financimit, përsa kohë nuk do të ketë një plan dhe një strukturë konkretë që dërgon sinjale të qarta se europianët do të mbështesin me çdo kusht dhe çdo kosto monedhën e përbashkët”," tha Obama në një konferencë për shtyp në kryeqytetin Kanabera të Australisë. Obama tha se pavarësisht krijimit të qeverive teknike në Greqi dhe Itali, “Europa përballet me një problem të vullnetit politik” dhe nuk përballet me një problem teknik.

"Ne do të vijojmë të këshillojmë udhëheqësit europianë në opsionet që ne i mendojmë se janë zgjidhej konkrete dhe qetësojnë tregjet. Por zbatimi i tyre kërkon marrjen e vendimeve shumë të rëndësime prej tyre. Aktualisht ata kanë nevojë për një mur mbrojtës në të gjithë europën që jep sinjalin e qartë se do të mbrojnë Eurozonën ”, tha Obama. Komentet e presidentit obama pasojnë komentet e një dite më parë të bëra nga ministri kanadez i financave, ministrisë kineze e financave dhe Guvernatori i Bankës Qendrore të Japonisë.