Misteri i plumbit për 29 vjeçarin dhe zhdukja e vajzës që e çoi në spital

Trevizo, 17 janar 2012, NOA/ Arjola Ymeraj- I goditur me plumb dhe i dërguar në spital me një plagë arme zjarri, emigranti shqiptar Shpëtim Koçiaj 29 vjeç u shtrua në spitalin e Trevizos në Itali në gjendje të rëndë, si protagonist i një zënke e përfunduar me gjak në një lokal nate.

29 vjeçari banues në San Dona di Piave, ishte brenda klubit të natës “Ambra” së bashku me 7 bashkëkombastë tij pas një zënke, por janë ende të dyshimta arsyet dhe rruga nga e cila ka ardhur plumbi, ndërsa mendohet që ai ka ardhur nga ambientet e jashtme të lokalit ku po zhvillohej një spektakël.

Mësohet se gjurmë të shumta gjaku u gjetën edhe në afërsi të banakut, në banjë dhe në parkimin e jashtëm, pas verifikimeve të bëra nga policia.

Djali u dërgua në spital nga një makinë në të cilën ndodhej një grua kolumbiane dhe një vajzë shqiptare, e cila u zhduk menjëherë nga spitali duke humbur kështu edhe gjurmët e saj, pasi u sigurua që Koçiaj u mor nën kujdes nga bluzat e bardha.

Sipas policisë thuhet se, e shtëna e armës e ka goditur në bark shqiptarin i ka shpuar një veshkë dhe më pas ka dalë nga shpina.

I riu ndodhet në gjendje të rëndë pas operacionit, dhe nuk ka mundur të japë dëshminë e tij në policinë e Trevizos, duke lënë të panjohur shkaqet e ngjarjes, autorët e saj dhe kush ishte vajza që e dërgoi në spital.

Mësohet se në polici kanë përfunduar 4 shqiptarë të cilët dyshohet se kanë marrë pjesë në grindje.

Sakaq nga ana e policisë nuk përjashtohet mundësia e konfliktit për ndonjë vajzë, ndërsa dyshohet edhe për larje hesapesh pasi shqiptarët e shoqëruar në polici, me përjashtim të 29 vjeçarit të plagosur kanë precedent penal në fushën e narkotikëve.
Burimi: Noa