Vrasjet e dy grave në Tiranë, mblidhen drejtuesit e policisë

Ngjarjet e ndodhura mbrëmjen e djeshme në Tiranë, ku humbën jetën dy gra ka bërë që drejtuesit më të lartë të policisë së Tiranës të zhvillojnë një mbledhje për situatën e krimit në kryeqytet. Pas laborantes, Eleni Basho, që u vra dje 30 metra larg shtëpisë, në spital humbi jetën dhe 25 vjeçarje Megi Jokiçi. Vajza e re nuk ka arritur t’i mbijetoj plagës së marrë nga arma e zjarrit dje në “Komunën e Parisit”. Ajo u dërgua në Spitalin Ushtarak, ku mjekët arritën t’i japin ndihmën e parë dhe duke përmirësuar disi gjendjen e saj. Por gjatë natës, Jokiçi ka ndërruar jetë.

Lidhur me këtë ngjarje dyshimet e para janë ato të pistës së hakmarrjes për shkak të të kaluarës së 28-vjeçarit, Aleksandër Gocaj i cili u plagos mbrëmjen e djeshme dhe që dyshohet të ketë qenë dhe shënjestra e atentatorëve.

Për të marrë masat dhe për të diskutuar mbi efektivitetin e forcave të rendit paraditen e sotme ju takuan Zv/drejtori i përgjithshëm i policisë Agron Kuliçaj, drejtori i krimeve të rënda Tonin Vocaj si dhe shefat e komisariateve të Tiranës. Qëllimi i mbledhjes është diskutimi për sigurinë në kryeqytet dhe zbardhjen e vrasjeve të ndodhura.

Për 25 vjeçaren Jokiçi dyshohet se ka mbetur e vrarë aksidentalisht gjatë një atentati që ka pasur si qëllim ekzekutimin e një të riu. Ndërsa për laboranten Basho ende nuk ka një pistë hetimi zyrtare, duke u mbuluar me mister ekzekutimi i saj./noa/