Autostrada, shembet bajpasi i Kukësit

Shembja ka ardhur për shkak të shirave të ditëve të fundit, duke bërë
që rruga të mos e kalojë provën me motin e keq
KUKËS- Me ardhjen e dimrit fillojnë edhe problemet e para në
autostradën Kukës-Morin. Bajpasi në hyrje të qytetit të Kukësit është
shembur duke mos e kaluar "provën" ndaj motit të keq që karakterizon
këtë zonë. Shëmbja ka ndodhur ditën e hënë, pas shirave të rrëmbyeshëm,
duke rrezikuar jetën e disa familjeve të cilat kanë shtepitë në kodrën
sipër rruges. Po ashtu, nga shembja rrezikohen edhe përdoruesit e
rrugës që duan të hyjnë në Kukës. Ndërmarrja e Rrugëve është mjaftuar
me heqjen e disa dherave ndërsa krerët e saj bëjnë të ditur se ndjehen
të pafuqishëm për eleminimin e saj pasi për rregullimin e së cilës,
sipas tyre, duhen fonde të konsiderueshme. Ky bajpas është vënë në
funksionim rreth dy muaj më parë. Segmenti ka filluar së ndertuari
fillimisht si pjesë kryesore e arteries së autostradës Kukes-Morin, por
më pas është shndërruar në rrugë hyrese të qytetit. Në periudhen kur
ndryshoi projekti, në segmentin që më pas u shndërrua në rrugë hyrese
për në qytetin e Kukesit ishin realizuar më shumë se 500 mijë Euro
germime.
I kontaktuar nga "Shekulli", njëri prej supervizorëve të firmës që
administron rrugën tha se projekti i këtij aksi është me mjaft defekte,
pasi në pjesën që ka ndodhur shembja nuk kanë qenë të planifikuar mure
mbajtese betoni, apo gabianë, megjithëse strukturat e dheut janë të
paqendrueshme. "Projektet në Shqipëri behen pa oponencë. Kjo është me
pasoja per cilësinë e investimeve që realizohen në këtë vend. I tillë
është edhe rasti bajpasit të Kukësit ku projekti paraqet mjaft
mangesi", - tha ai duke shtuar se punimet për ndërtimin e kësaj vepre
kanë qënë pa cilësi. Gërmimet për ndërtimin e kësaj rruge janë kryer në
periudhen tetor 2006-mars 2007. Tashmë kanë kaluar dy vite keshtu që ky
aks është jashtë afatit të garancisë. Specialistët theksojnë se është e
domosdoshme nderhyrja urgjente e shtetit, konkretisht e Ndermarjes së
Rrugeve me një projekt me mure mbajtes apo me rrjetë për të shpetuar
jetën e familjarëve dhe rrugën në terësi nga dëmtimi i plotë i saj.
Ndërkohë, shirat e këtyre ditëve kanë nxjerrë në pah edhe defekte të
tjera në aksin kryesor të autostrades Kukes-Morin. Është pikërisht
segmenti poshtë qytetit të Kukesit, ku ujërat kanë dalë mbi rrugë. Kjo
ka ardhur si pasojë e derdhjes së ujërave të zeza dhe të bardha të disa
familjeve që i kanë të ndërtuara shtëpitë sipër autostradës. "Kemi
kërkuar bashkëpunimin e familjeve në mënyrë që ujërat të kalonin përmes
tombinove, por nuk kemi gjetur bashkëpunimin e tyre", -shprehet
supervizori Omer Llukovi.