Bota në këmbët e tyre

Kampionati i 19-të Botëror i Futbollit nis në vendin e kontrasteve të mëdha

Kjo sentencë e njohur e finaleve të botërorëve, nuk e ka humbur
domethënien e saj, ndaj edhe dita e parë e fillimit të këtij evenimenti
të rëndësishëm, është një festë. Është festa e futbollit. Magjia e tij,
duke filluar, që sot më 11 qershor e deri më 11 korrik, do të përfshijë
gjithë globin.
Një muaj futboll në kulmin e tij, një muaj
futboll të ngritur në nivele spektaklesh. Një muaj futboll, që do të
shkëlqejë mbrëmjet afrikane. Një muaj futboll, të mbushur me dëshira,
ëndrra, fantazi, emocione, që veç një sport si futbolli di t’i dhurojë.

Është një botëror i ngarkuar me yje. Janë yje që kushtojnë,
sa vetë yjet: Messi, Kristiano Ronaldo, Uejn Runej, Fernando Torres,
etj, janë disa prej tyre. Futbolli, duke filluar që sot, është një
superfuqi që ia kalon çdo gjëje, është sporti që i imponohet gjithkujt.
Kur e gjithë bota është rrudhur nga kriza ekonomike, futbolli është i
vetmi që nuk e njeh atë. Kampionati i 19-të Botëror i Futbollit, sot
çel siparin e tij përmes bukurisë dhe surprizave. Në fakt, çfarë
vlere do të kishte ky eveniment, nëse nuk i kishte me bollëk gjëra të
tilla, nëse nuk do të shoqërohej me një dozë të fortë surprizash, me
skuadra që bëhen ‘viktima’ dhe me lojtarë kapriciozë, që tentojnë të
kapin vetëm një moment lavdie nën diellin e Afrikës së Jugut.
Ky
pra, do të jetë botërori i këtij viti: I madh, kontradiktor, i
shtrenjtë, mosbesues, kapricioz, emocionues deri ku nuk shkon më! Mund
të vazhdoj më gjatë, por gjithsesi, çfarë kuptimi do të kishte
futbolli, aq më tepër Kampionati Botëror, pa spekulime dhe aludime
paraprake?