Trajneri Josa: “Do ndryshoj ekipin e Radonjiç, dua një skuad

Mirel Josa është ndryshimi i madh i Vllaznisë, por nuk është i fundit. Ardhja e trajnerit të ri, pas largimit të malazezit Mojash Radonjiç të shkarkuar për rezultate të dobëta në 8 javët e para, ka rizgjuar besimin e shkodranëve për një sezon më të mirë pjesën e mbetur të Kategorisë Superiore me syrin për të ngjitur pozicione dhe për të pretenduar të paktën një vend që të çon në Europa League. Entuziazmi është i pranishëm në kryeqendrën e veriut të Shqipërisë. Tekniku gëzon respektin dhe mbështetjet jo vetëm të drejtuesve që rikthyen për herë të dytë në krye të pankinës së Vllaznisë, por edhe atë të tifozëve vendas, të cilët janë më të zjarrtët në futbollin shqiptar dhe jo pak kërkues ndaj trajnerit dhe ekipit të tyre. Gjithnjë në të kaluarën fansat kuqeblu kanë demonstruar se pëlqejnë jo vetëm rezultate pozitive, por edhe futbollin e bukur. Prandaj ata nuk duan që besimi i madh te Josa të shpërdorohet. Por prova e parë e zjarrtë për trajnerin e ri ka ardhur shumë shpejt. Sot në orën 16:00 skuadra kuqeblu do të zbresë në fushë, në “Loro Boriçi” për t’u përballur me Flamurtarin, njërën nga skuadrat më simpatike të edicioneve të fundit të Superiores dhe që, pas përforcimeve të shumta në këtë sezon dhe gërshetimit të eksperiencës me talent e shumta, pretendon të shkojë larg. Do të jetë një ndeshje jo e lehtë për shkodranët, të cilët nuk mund t’i lejojnë me vetes hapa falsë, të cilat do t’i komprometonin edhe më shumë objektivat e tyre sezonalë. Alternativa e vetme e Josës dhe e skuadrës së tij do të jetë fitorja. Çdo rezultat tjetër do të ishte kundër frymës së re të këtyre ditëve dhe do të rikthente pesimizmin rutinor që ka mbizotëruar në këtë fillim sezoni. Prandaj Josa duhet t’ua shpërblejë tifozëve me një fitore ndaj Flamurtarit. Megjithatë, trajneri, edhe pse në pak ditë, e ka përgatitur skuadrën për të triumfuar në ndeshje. Në mënyrën e ndërtimit të taktikës së lojës, të anës psikologjike, të përzgjedhjes së formacionit, studimit të kundërshtarit dhe shumë faktorë të tjerë. “Në sfidën kundër Flamurtarit dua të shikoj në fushë një Vllazni agresive, ka theksuar tekniku Josa. Përballë do të kemi një kundërshtar shumë të fortë, i cili përveçse ka një skuadër shumë të mirë, është edhe një ndër pretendentët për të fituar trofe gjatë këtij sezoni. Megjithatë, objektivi ynë në ‘Loro Boriçi’, është pa diskutim vetëm fitorja”. Në momentin e riemërimit, trajneri i ri kishte njohuri rreth skuadrës që do të merrte në dorëzim nga Radonjiç. Brenda 5 ditëve, tashmë ai i ka evidentuar disa nga pikat kryesore ku duhet të ndërhyjë dhe prandaj dje ai ka paralajmëruar ndryshime në krahasim me ekipin që zbriste në fushë tekniku malazez, i ikur tashmë. “Prisni ndryshime në formacionin e parë të Vllaznisë, pasi ju garantoj që nuk do të jetë më e njëjta skuadër, si ajo me Radonjicin”, nënvizoi Josa, i cili më pas nuk ka preferuar të zbardhë se cilat do të jetë këto ndryshime, duke e lënë gjithçka surprizë për sot. Ndaj Flamurtarit, shkodranëve do t’u duhet të bëjnë llogaritë pa tre futbollistë titullarë: Djepaxhia, Nimani, Semina vazhdojnë të jenë të dëmtuar.