Fatjon Sefa “kërcënon” Dinamon: Më tepër hapësira, ose iki n

Sulmuesi rikthehet në formacionin titullar pas 7 javësh, prej mungesës së Bajat
Fatjon Sefa “kërcënon” Dinamon. Sulmuesi kërkon më tepër hapësira në radhët e bluve kryeqytetas, në të kundërt thekson se nuk e përjashton mundësinë e largimit gjatë merkatos së janarit. Prej emërimit të trajnerit Luis Manuel Blanko, lushnjari ka vuajtur mungesën e hapësirave. Gjatë këtij sezoni, 26-vjeçari po përjeton momentet më të vështira te blutë, që prej transferimit në verën e vitit 2008. Bakaj dhe Martinena janë titullarë të padiskutueshëm në formacionin e teknikut argjentinas, ndërsa “bomberi” shtatlartë është detyruar të qëndrojë në stol. Kjo, pavarësisht faktit se gjatë sezonit të kaluar ai ishte një prej protagonistëve kryesorë në fitimin e titullit kampion: në edicionin e dominuar nga Dinamo, Sefa realizoi 13 gola, duke qenë golashënuesi i dytë më i mirë i skuadrës, me dy rrjeta më pak se Elis Bakaj.

Të hënën, në sfidën në fushën e Kastriotit, Sefa do të rikthehet në 11-shen e parë, pikërisht prej mungesës së Bakajt. Pas shtatë ndeshjesh në Kategorinë Superiore, sulmuesi do të ketë mundësinë të tregojë vlerat e tij. Në fakt, lushnjari është aktivizuar si titullar vetëm gjatë dy javëve të para të kampionatit (të cilave u shtohen edhe starti nga minuta e parë në ndeshjen e Kupës së Shqipërisë, ku Dinamo fitoi 2-0 në fushën e Luzi 2008). Duke llogaritur që tashmë është në kulmin e moshës, situata e krijuar te Dinamo është e papranueshme për Sefën. Lojtari konfirmon se do të japë më të mirën në takimin në Krujë, të vlefshëm për javën e 9-të të aktivitetit elitar në vend, ndërsa thekson se nëse gjërat nuk ndryshojnë, largimi mbetet një opsion. “Do të mundohem të jap maksimumin për skuadrën në këtë ndeshje përballë Kastriotit. Megjithatë, kjo sfidë është mjaft e rëndësishme për mua që të tregoj vlerat e mia. Të hënën, por edhe në takimet deri në fund të vitit 2010 kur do të më jepet mundësia do të luaj mbi të gjitha për të fituar vendin e titullarit në skuadër”, deklaroi sulmuesi. “Nëse deri në janar situata nuk do të përmirësohet, unë do të shoh mundësinë që të largohem nga Dinamo, pasi jam në një moshë që nevojë të luaj me vazhdimësi”.