Partizani kërkon pikë në shtëpinë e Apolonisë

Kategoria e Parë
Dita e sotme do të shikojë të zbresin në fushë të gjitha skuadrat e Kategorisë së Parë, për të luajtur ndeshjet e javës së shtatë të sezonit të ri. Një ndër ndeshjet interesante të kësaj jave do të jetë ajo mes Partizanit dhe Apolonisë, që do të zhvillohet në shtëpinë e këtyre të fundit. Të kuqtë vijnë në këtë ndeshje pas një përmirësimi të dukshëm në javët e fundit, që japin shpresë se ekipi po merr kthesën dhe tani ambiciet janë të shikojnë ngjitjen drejt kreut të tabelës. Bajko është optimist për zhvillimet e fundit dhe beson se sot ndaj Apolonisë do të mund të demonstrojë një lojë të mirë dhe pse jo të largohet nga Fieri me të paktën një pikë. Ndërkohë që fierakët janë ekip ambicioz dhe objektivi i vetëm i tyre do të jetë fitorja, e cila do t’i mbante në rrugën e duhur drejt objektivit të tyre sezonal: rikthimit në Kategorinë Superiore. Ndërsa ndeshje jo të lehta propozon kalendari për kryesuesit e tjerë. Kamza e vendit të parë do të luajë në transfertë me Besëlidhje, Mamurrasi udhëton drejt Beratit për të luajtur ndaj Tomorit të oscilacioneve. Lushnja pritet ta ketë të vështirë në fushën e Tërbunit.