Berisha gjen golin e parë sezonal, por Arminia humbet

Bundesliga 2
Sulmuesi prish “agjërimin” 14-mujor në kampionatin gjerman
Besart Berisha arrin të zhbllokohet. Sulmuesi kosovar ka realizuar të premten në mbrëmje rrjetën e parë sezonale me Arminian e Bielefeldit. Gjithsesi, goli i 25-vjeçarit, që ka zhvilluar 17 ndeshje me përfaqësuesen shqiptare nuk i ka mjaftuar skuadrës së tij për të marrë rezultat pozitiv përballë Unionit të Berlinit. Në fakt, të besuarit e trajnerit Zige janë mposhtur me rezultatin 2-1 në shtëpi, ndërsa vazhdojnë të jenë në vendin e fundit (të 18-tët) në klasifikimin e Bundesligës 2. Në minutën e 63-të, Berisha rikthehu baraspeshën, pas avantazhit fillestar të Unionit të Berlinit me Peitz, vetëm dy minuta më parë. Por, shkëndija e tij nuk i ka mjaftuar Arminias. Miqtë gjetën sërish rrugën e rrjetës në të 73-tën me Beniaminan. Sulmuesi shqiptar qëndroi në fushë gjatë gjithë 90-minutëshit, ndërkohë që është ndëshkuar edhe me karton të verdhë. Me golin e djeshëm, Besart Berisha i jep fund “agjërimit” 14-mujor në kampionatin gjerman. Sulmuesi nuk kishte arritur të gjente rrugën e rrjetës në dhjetë ndeshje gjatë sezonit 2009-2010, kur u rikthye në Gjermani tek Arminia pas aventurës te danezët e Horsens. Ky ishte takimi i pestë sezonal, nga dhjetë javë të zhvilluara, që Berisha u aktivizua dhe i dyti që 25-vjeçari e nisi si titullar.