Çmime popullore për biletat e miqësores Shqipëri-Maqedoni

Miqësorja
Stadiumi i Korçës pritet të jetë i mbushur me kapacitet të plotë, për miqësoren e 17 nëntorit që Shqipëria do të luajë me Maqedoninë. Kjo, jo vetëm për faktin se interesimi i fansave në qytetin juglindor dhe i zonave përreth do të jetë mjaft i madh për “zbarkimin” e parë të kuqezinjve, por edhe sepse FSHF-ja ka vendosur që çmimet e biletave të jenë mjaft të ulëta. Një vend në tribunën kryesore, por edhe në atë karshi, do të kushtojë 500 lekë të reja, ndërsa biletat për tribunat mbrapa dy portave kushtojnë vetëm 200 lekë të reja. Ekipi kombëtar pritet të grumbullohet të dielën, më 14 nëntor, ndërsa është menduar që akomodimi të bëhet në Pogradec. Në miqësoren me maqedonasit, Shqipëria do të rigjejë edhe trajnerin Josip Kuzhe. Aktualisht tekniku ndodhet në Kroaci, ndërsa është konfirmuar që ai do t’i bashkohet skuadrës në grumbullim dhe do të jetë në krye të stolit, pas hemorragjisë cerebrale që pësoi më 30 shtator.