UEFA: Itali-Serbi, 3-0 në tavolinë

Një ndeshje pa tifozë për serbët, paralajmërime dhe gjoba për të dyja federatat
Më në fund UEFA ka vendosur: Itali-Serbi 3-0 në tavolinë. Për serbët një ndeshje me porta të mbyllura, plus një tjetër me kusht, plus edhe 120 mijë euro gjobë. Për Italinë, 100 mijë euro gjobë dhe një ndeshje me dyer të mbyllura me kusht. Pra nëse brenda dy viteve nuk do të ndodhin gjëra të tilla, ndëshkimi me kusht fshihet. Veç të tjerave, për të gjitha federatat është e detyrueshme të mos u shesin bileta tifozerisë serbe. Ky është verdikti i një çështjeje që, gjithsesi, nuk do të mbyllet këtu: për apelim ka kohë deri të hënën, ndërsa arsyet do të depozitohen brenda 7 ditëve. Dhe pastaj, natyrisht, mbetet mundësia e dërgimit të çështjes në Tas. Në mëngjes, mbledhja në Nion është mbajtur sipas procedurave normale. I pari që foli ishte gjyqtari Thomson, që ka konfirmuar atë që shkruhej në raport dhe domosdoshmërinë e ndërprerjes së ndeshjes. Pastaj ishte radha e delegatit të UEFA-s, i cili nënvizoi bashkëpunimin e mirë me federatën italiane gjatë natës xhenoveze. Erdhi radha e delegacionit italian: “Bëmë më të mirën e mundshme për të evituar një tjetër Heysel. Serbia nuk kishte informuar për rrezikun e ardhjes së ultrasve në masë”. Pikëpamje të kundërta, natyrisht, nga delegacioni serb, i cili drejtoi gishtin te problemet organizative italiane. Seanca u mbyll pas aktakuzës së prokurorit dhe ndërhyrjes së avokatëve. Pra, pas dy javës e gjysmë UEFA bën të ditur verdiktin e saj të parë. Gjithçka ndodhi më 12 tetorin e shkuar, në Marasi, ku ultrasit serbë krijuan një ferr të vërtetë. Gjërat kishin shkuar keq edhe para hyrjes në stadium të tifozëve nga Beogradi (3 të ndalur dhe 15 të plagosur serbë në përplasjet me policinë, ishte shkarravitur muri i “Palazzo Ducale”). Plus kërcënimit të Vladimir Stojkoviç, portierit të kontestuar në atdhe, sepse kishte kaluar nga Ylli i Kuq te Partizani i Beogradit dhe sepse quhej “fajtor” për disa gabime në humbjen në shtëpi ndaj Estonisë. Pastaj situata precipitoi brenda impiantit: rreth 1600 ultras, në sektorin e miqve, “kafazi” i zakonshëm i Ferraris, 10 minuta pas vërshëllimës të fillimit të ndeshjes filluan të hedhin bomba tymuese drejt sektorit të veriut, të mbushur me tifozë italianë. Më pas hodhën bomba tymuese në fushë. Ndërhyrja e zjarrfikësve u shoqërua me shpërthimin e një bombe artizanale. Arbitri skocez, Thomson, edhe pse në anë të fushës ishin rrethuar policët, u përpoq të rifillonte ndeshjen. Por mes tymit, tifozëve që kishin shqyer rrjetën mbrojtëse (mes të cilëve trupmadhi Ivan Bogdanov, që nxiste turmën me pinca në dorë dhe kishte djegur më parë flamurët shqiptarë dhe kosovarë), shumë shpejt vendosi pezullimin dhe anulimin e takimit. Vetëm 6 minuta lojë dhe më pas u futën në dhomat e zhveshjes. Përleshjet vazhduan dhe natën, gjatë operacionit delikat të evakuimit të tifozëve serbë nga stadiumi. Kapoja i ultrasve, Ivan Bogdanov, i kap në vendin e bagazheve të autobusit të fundit: që nga ai moment, çështjet lidhur me arrestimin dhe procedimin e tij janë bërë ushqim për shtypin italian e serb. Më pas federatat përkatëse nisën me akuza e kundërakuza, që vazhduan deri në sentencën e djeshme.