Mou: “Klasikja” të shtunën dhe Benzema nuk ka vdekur

Real Madrid
Dy “goditje” të vogla për Barçën dhe një hap përpara në tentativën për të rikthyer Karim Benzemanë në formën optimale. Situata te Reali i Madridit është e mirë dhe për momentin Zhoze Murinjo nuk ka përse të hapë luftë, të dhurojë tituj bombastikë apo të ngrejë polemika. “Karim nuk ka vdekur, ashtu si kam lexuar në një gazetë. Ai nuk është jashtë skuadrës dhe nuk kam grumbulluar një lojtar nga ekipi ‘B’ në vend të tij. Nuk mund të them se Benzema po luan mirë, kjo nuk do të ishte e vërtetë, por mund të konfirmoj se po punojmë që ta kthejmë në nivelet e tij të zakonshme. Disa javë më parë flitej për mungesën e golave të Kristiano Ronaldos, ndërsa tani të gjithë thonë se ai është i pandalshëm”, tha Murinjo. Më tej, tekniku luzitan ka folur edhe për Barçën, duke u përfshirë në debatin e madh për datën kur do të luhet “Klasikja”: të shtunën më 27 nëntor, të dielën më 28 apo të hënën më 29? E shtuna nuk pëlqehet nga “blaugranat”, që të mërkurën luajnë në Champions në Greqi, e diela nuk i shkon për shtat Komunës së Barcelonës, pasi janë zgjedhjet, ndërsa e hëna nuk pëlqehet nga familja e futbollit. “Mou” tha: “Ne kemi zhvilluar ndeshje vetëm pas dy ditëve pushim, nuk është ndonjë dramë”. Një mesazh i qartë për ata në “Kamp Nou”: nuk është problem të luhet të shtunën.