Maradona mbush 50 vjeç dhe ëndërron të punojë në Angli

Legjenda
Sot Diego Armando Maradona feston 50-vjetorin e lindjes. Për ditën ku feston gjysmëshekulli jetë, “Pibe de Oro” kërkon si dhuratë një skuadër në kampionatin anglez. “Do të më pëlqente të punoja në Premier League. Skuadrat e këtij kampionati janë të shkëlqyera, niveli i futbollit është i jashtëzakonshëm dhe lojtarët që militojnë aty janë ndër më të mëdhenjtë në arenën ndërkombëtare”, deklaroi legjenda e futbollit argjentinas dhe atij botëror. Diegon e ka marrë malli për stolin, megjithatë e vërteta është se edhe futbollit i mungon Maradona. Për të mos folur këtu për “bashkëjetesën” ndërmjet trajnerit dhe tabloidëve anglezë, e cila do të ishte eksplozive. Pasi drejtoi Argjentinën në Botërorin 2010, Maradona pret një ofertë. Gjithsesi, ai e ka të qartë se klubet e mëdha në Premier League nuk kanë nevojë për një teknik të ri. “Problemi i vetëm, pohoi ai, është se skuadrat që më pëlqejnë në Angli kanë trajnerë të mirë. Por, nëse do të më vinte një ofertë për një detyrë të rëndësishme, do ta pranoja menjëherë. Jam përfolur për Aston Vilën? Dua të sqaroj se nuk është e vërtetë”. Në fund të deklaratës së tij, Maradona tha: “Nga Kombëtarja më hoqën në mënyrë të padrejtë. Gjithsesi, e di që një ditë do të rikthehem në krye të skuadrës së vendlindjes. Ky është fati im dhe po pres që të realizohet”.