Roma fiton, por humb Totin për derbin

Verdhekuqtë mundin Leçen 2-0. Kapiteni ndëshkohet me karton të kuq pas një provokimi
Një lajm i mirë për Romën dhe një i keq. Në “Olimpiko” skuadra e Ranierit mund 2 0 Leçen falë golave në pjesën e dytë të Burdisos e Vuçiniçit, por në derbi nuk do të jetë Toti. Kapiteni ndëshkohet me karton të kuq në minutën e 77 të pas një stërkëmbëshi që i dha Olivera (i kuq edhe për të). Dhe ndërsa del kalon thuajse në histerizëm për të ndjekur uruguajanin që po shkonte drejt dhomave të zhveshjes. Pjesa e parë u mbyll pa gola dhe shumë raste: një super Rosati shpëton miqtë.
Në pjesën e dytë një tjetër shtyllë për Romën dhe gola. Tri shtylla, dy të Romës e një e Leçes dhe shumë raste për gol nga njëra anë dhe tjetra: nuk ka asnjë pushim në pjesën e parë të ndeshjes Roma Leçe. Në të vërtet janë verdhekuqtë ata që këmbëngulin më shumë sidomos me Vuçiniç që shpërdoron shumë raste. Por Roma nuk është e qetë dhe lëshon terren, duke rrezikuar të kapitullojë. Në fundin e pjesës së parë është Burdiso ai që shpëton portën nga një goditje e Korvias, me Hulio Serxhion jashtë shtyllave.
Pjesa e dytë nis mirë për miqtë që rrezikojnë me Piatin e Di Mikelen, por këtë herë është Hulio Serxhio që shpëton portën. Në minutën e 62 të pas një krosimi nga e djathta, Burdiso kërcen më shumë nga të gjithë dhe shënon me kokë golin e parë dhe Roma merr kontrollin e ndeshjes dhe dyfishon me malaziasin Vuçiniç pas një asisti të Totit. Pikërisht në minutën e 77 të ndodh dhe incidenti: në vrapim e sipër Olivera pengon Totin pa top që rrëzohet në tokë dhe reagon.
Gjyqtari Xhervazoni i ndëshkon të dy me karton të kuq. Kapiteni nuk bën rrëmujë në fushë, por në një moment të dytë e kupton që do të mungojë në derbin me Lacion, javës që vjen dhe e kap inati me Oliverën që futet në dhomat e zhveshjes. Drejtuesit romanë mezi e mbajnë Totin e dëshpëruar. Ndeshja nuk kishte më për të thënë. Roma fiton, por nuk mund të festojë gjithsesi, sepse të dielën do t’i mungojë kapiteni.
Trajneri
Ranieri krenohet me Vuçiniçin: I jashtëzakonshëm!
Klaudio Ranieri paraqitet i qetë në sallën e konferencës për shtyp në fund të ndeshjes që Roma e tij e fitoi 2-0 ndaj Leçes. “Jemi akoma mjaft të brishtë, por skuadra luajti mirë, krijoi shumë raste për gol, - tha trajneri verdhekuq. - Mund të shënoheshin shumë gola si nga ne, ashtu edhe nga Leçja. Ishte një ndeshje shumë korrekte”.
Por mungesa e Totit, që u ndëshkua me karton të kuq do të ndikojë shumë në derbin e javës që vjen me Lacion: “Olivera bëri një faull ndaj kapitenit ndërsa ishte në kundërsulm, pastaj po flisnin, - shton Ranieri. - Besoj se kartoni i verdhë do të ishte më i drejtë, i kuqi m’u duk pak i tepruar”. Ranieri në fund lavdëron të gjithë skuadrën, por para së gjithash Mirko Vuçiniçin: “Luajti një ndeshje të madhe. Nëse luan gjithnjë kështu, do të ishte “mbret”.
Mungesa e Totit kundër Lacios sipas Nikolas Burdisos: “Ai është simboli ynë, - komenton argjentinasi që shënoi dje golin e parë. - Kapiteni është shumë i rëndësishëm jo vetëm për atë që jep në fushë, por për atë që do të thotë për të gjithë ne. Megjithatë ne luajtëm një ndeshje të madhe pas një periudhe jo të mirë. Mendoj se duhet t’i bëjmë tifozët për vete me lojë, rezultate, me dëshirën që kemi dhe që duhet të kemi në çdo ndeshje”.