Barça ndjek Realin, Mesi i përgjigjet Ronaldos

Portugezi dhe argjentinasi shënojnë dy gola, teksa “gjigandët” e kampionatit spanjoll vazhdojnë duelin
Kristiano Ronaldo po përjeton një nga momentet më të mira të karrierës së tij. Ai ka shënuar dy gola në shtatë minutat e fundit, duke i dhënë Realit të Madridit fitoren 3 1 ndaj Herkulesit, në një ndeshje ku kryeqytetasve iu desh të vuanin shumë. David Trezege shënoi golin e avantazhit për vendasit pas vetëm tri minutash lojë. Herkules, që ka mundur Barcelonën dhe Seviljen gjatë këtij kampionati, ndërtoi një “digë” para portës dhe i rrezistoi sulmeve të Realit gjatë gjithë pjesës së parë. Gonzalo Higuain dhe Ksabi Alonso nuk qëlluan në shenjë.
Gjithsesi, Reali arriti të barazojë shtatë minuta nga fillimi i pjesës së dytë. Portieri Kalatujad nuk mundi të zotërojë topin e goditur nga Kristiano Ronaldo dhe Angel Di Maria përfitoi, duke shënuar për miqtë. Sulmet e Realit u intensifikuan dhe 15 minuta para fundit, Mourinjo luajti kartën Karim Benzema. Sulmuesi francez zuri vendin e Pepes, për një Real “super-ofensiv” me pesë sulmues në fushën e lojës. Pikërisht nga këmbët e francezit erdhën dy golat e fitores shënuar nga Kristiano Ronaldo.
Tetë minuta para fundit, Benzema goditi në portë dhe topi i pritur nga portieri përfundoi te Kristiano Ronaldo, për të cilin ishte si një lojë fëmijësh të shënonte me portën e boshatisur golin e dytë për Realin. Katër minuta më vonë, Ronaldo mbylli ndeshjen me golin e tij të 12 të, në nëntë javët e para të kampionatit. Kjo fitore e mban Realin e Mourinjos në vendin e parë të klasifikimit me 23 pikë. Në mesjavë, “merengesit” do të ndeshen me Milanin në “San Siro” në Ligën e Kampioneve.
Barcelona i është përgjigjur Realit të Madridit duke arritur fitoren më bindëse të këtij sezoni, 4-0 ndaj Seviljes në “Kamp Nou”. Vetëm katër minuta iu deshën Lionel Mesit për të shënuar golin e parë për skuadrën e Pep Guardiolës. Në mesin e pjesës së parë David Vila dyfishoi avantazhin për vendasit, ndërsa sapo nisi pjesa e dytë Dani Alvesh shënoi golin e tretë.
Sapo u mbush një orë lojë, Mesi shënoi golin e katërt duke ruajtur mesataren e tij të frikshme me dy gola për ndeshje në tri ndeshjet e fundit. Argjentinasi kishte shënuar dy herë edhe në fitoret ndaj Kopenhagenit dhe Saragozës. Barcelona e Guardiolës ngjitet në vendin e dytë të kampionatit, me një pikë më pak se Reali i Madridit. Në ndeshjen e ardhshme për Ligën e Kampioneve, Barça luan në fushën e grekëve të Panathinaikosit.