Verderi zhgënjen, Frankfurti ngjitet i treti

Ajntrahti “fluturon” pas fitores ndaj St.Paulit. Nurembergu fiton në Bremen. Novakoviç “nderon” Këlnin
Milivoje Novakoviç ishte protagonisti kryesor i ndeshjeve të luajtura dje në Bundesligë. Sulmuesi slloven shënoi tri herë në portën e Hamburgut, duke i dhënë Këlnit fitoren 3 2. Verderi dështon në Bremen ndaj Nurembergut, ndërsa Fanis Gekas udhëhoqi Frankfurtin, në fitoren 3 1 ndaj St.Paulit që e mbylli ndeshjen me dhjetë futbollistë. Volfsburgu dhe Kaizerslauterni fituan në fushat e tyre respektivisht ndaj Shtutgartit dhe Mynshegladbahut. Të premten, Bajerni mundi Fraiburgun 4 2.
Këlni ka mposhtur 3 2 Hamburgun duke dalë nga zona e ftohtë e renditjes. Heroi i ndeshjes ishte Novakoviç, që i shërbyer në mënyrën e duhur nga Lukas Podolski, i shkaktoi dëme mbrojtjes së Hamburgut. Takimi nisi me katër gola në 30 minutat e para. Novakoviç kaloi në avantazh Këlnin, por Hamburgu përmbysi gjithçka me golat e Mlladen Petriç dhe Son. Pastaj Novikoviç bëri diferencën edhe dy herë të tjera për vendasit. Zhgënjen Verder Bremeni, që është mposhtur në fushën e tij nga Nurembergu, pavarësisht se shënoi që në fillim të ndeshjes me anë të Hugo Almeidas.
Por ajo që dukej si një fitore e lehtë u shndërrua në disfatë për vendasit. Minutat e fundit e pjesës së parë dhe të parat e pjesës së dytë ishin “të arta” për Nurembergun që përmbysi gjithçka me gola të Gyndogan dhe Ekiçi. Goli i tretë për miqtë u shënua sërish nga turku Gyndogan dhe ata kalojnë Verderin në klasifikim. Nurembergu ka 15 pikë, ndërsa Verderi 14 të. Goli i Pizarros në minutën e fundit vlen vetëm për statisikë. Simon Kjaer dhe Edin Dzeko shënuan nga një gol në çdo pjesë loje, duke i dhënë Volfsburgut fitoren 2 0 ndaj Shtutgartit.
“Ujqërit” nuk kishin alternativë tjetër veç fitores dhe Kjaer largoi makthin nga trajneri Stiv Mek Laren, duke shënuar pas vetëm gjashtë minutash lojë. Shtutgarti, që aktualisht ndodhet në zonën e rënies nga kategoria u përpoq të barazonte, por fati nuk ishte me të dhe përfundimisht doli jashtë loje kur Dzeko mbylli llogaritë me golin e dytë. Kaizerslauterni fitoi 3 0 ndaj Borusias së Mynshegladbahut, në një tjetër ndeshje të luajtur për javën e dhjetë të Bundesligës.
Të tre golat u shënuan në 20 minutat e fundit. Pjesa e parë në “Fritc Valter” ishte e mërzitshme dhe shumë nervoze. Ndeshja vazhdoi e tillë, derisa Kristian Tifert shënoi për Kaizerlauternin në fillimin e pjesës së dytë. Golat e tjerë nga Nemec dhe Lakiç i ngjisin vendasit në vendin e 14 të. Krej ndryshe është situata te Frankfurti, që pasi ka fituar 3 1 në fushën e St.Paulit është ngjitur në vendin e tretë të renditjes, duke regjistuar startin më të mirë në 18 vitet e fundit.
Sulmuesi grek Theofanis Gekas ishte protagonisti i Ajntrahtit, teksa shënoi dy herë, duke u ngjitur në kuotën e nëntë golave në këtë kampionat. St.Pauli e mbylli ndeshjen me dhjetë futbollistë. Të premten, Bajerni fitoi 4 2 ndaj Fraiburgut, ndërsa sot luhet kryendeshja e javës mes dy vendeve të para Mainc Dortmund.