Alonso: Botërori nuk është mbyllur!

Spanjolli i Ferrarit besoi te skuderia e kuqe edhe kur kishte 47 pikë më pak se Hamilton
Të paktë kanë qenë ata që besonin në korrik se Alonso sot do të ishte në vend të parë në kampionatin e F1, pasi në atë kohë ai ishte 47 pikë pas Ljuis Hamiltonit pas Çmimit të Madh të Britanisë. Atëherë Alonso thoshte “do të fitoj botërorin”, por pak veta i besonin.
Vetëm respekti ndaj tij, si kampion i dyfishtë i botës, bëri që gazetarët të mos buzëqeshnin. Ndoshta ka qenë instinkti i sportistit ose bindje reale, nuk i dihet, por Fernando Alonso sot gjendet në krye të renditjes dhe e ka nxjerrë Ferrarin nga kriza e verës (19 pikë për skuadrën në tre gara, nga Kanadaja në Silverstone).

Reagimi “Ne kemi reaguar me të vetmen mënyrë që njohim - ka thënë drejtori i menaxhimit sportiv, Stefano Domenikali duke punuar pa u ndalur. Por tani duhet të vazhdojmë në këtë rrugë sepse do të ishte gabim i madh po të mendonim se e siguruam fitoren. Gara në Kore na tregoi se mjafton një garë për të qenë në lojë.” Në pritje që garat në Interlagos (7 nëntor) dhe në Abu Dhabi (një javë më pas) të japin verdiktet për këtë sezon, Alonso ka 11 pikë më shumë se Veber dhe 21 ndaj Hamilton, tifozët e Ferrarit janë ende të entuziazmuar nga magjitë e Alonsos në Kore.
“Ishte garë shumë e vështirë - ka shpjeguar spanjolli, duke e quajtur si suksesin e tij të parë special në një pistë të lagur. Nuk kishim ku të mbështeteshim si referencë sepse provat u bënë në pistë të thatë. Ishte gara e parë në një pistë të tillë dhe nuk kishim parametra për t’u referuar. Në disa pika të pistës aderenca ishte e mirë, në të tjera e keqe. Për fat të mirë, makina F10 ishte perfekte.”
Skuadra Fjalët e para të Alonsos kanë qenë pikërisht për skuadrën, që ka bërë një punë të madhe në zhvillimin e makinës. Të dielën kur Red Bull merr për herë të parë 0 pikë si skuadër dhe vë në diskutim edhe titullin e konstruktorëve, që dy ditë më parë e kishte thuajse të sigurt (Red Bull 426, McLaren 399, Ferrari 374), Ferrari ka arritur një triumf, që do të mbahet mend nga tifozët e saj (Veber ishte më fajtori, Vetel i pafat, Hamilton humbi një rast të madh).
Përmbysja - Në katër gara Alonso ka marrë 62 pikë më shumë se Hamilton, 49 pikë më shumë se Veber, 35 në krahasim me Vetel. “Nuk ka ndryshuar asgjë” ka thënë Fernando, i cili megjithatë ka qenë shumë i lumtur pas garës (në xhiron e nderit, në funksion edhe të marketingut të Ferrarit) dhe kjo ishte shenja e vetme e euforisë së tij, para se të kthehej sërish në rolin e modestit. “Kujdes, Red Bull ka kapur 14 pole position nga 17 kujton Domenikali dhe sigurisht që ka një motiv për të qenë shumë të kujdesshëm.”