Befasi vlonjate, Vllaznisë s’i bën derman as Josa

Flamurtari ka marrë një fitore tepër të vyer në Shkodër, teksa e mban në krye të renditjes

Vllaznia Flamurtari 1 3
Shënues: Jovanoviç 28′ (11 m), Sakaj 38′ (11 m), Liçaj 50′, Xhafaj 77′
Vllaznia: Vujadinoviç, Smajli, Rajoviç, Kukaj, Belisha, Gocaj (Hasani 73′), Sykaj (Nallbani 46′), Vajushi, Kaçi (Shtubina 58′), Jovanoviç, Sinani. Trajner: M.Josa.
Flamurtari: Spaho, Brahja, Progni, Liçaj (Begaj 80′), Veliu, Devolli (Kuqi 84′), Lena, Bajevski (Grami 60′), D.Xhafaj, Ahmataj, Sakaj. Trajner: G.Magani.
Gjyqtarë: B.Pashaj (Tiranë), E.Miho, F. Elezi (Durrës)
Kartonë të verdhë: Jovanoviç, Rajoviç, Sinani, Liçaj, Ahmataj

Komenti
Vlonjatët kanë ngritur “flamurin” dje në Shkodër ndaj një Vllaznie që dha përshtypjet e një skuadre në ndryshim në pjesën e parë, por në të dytën la shumë për të dëshiruar. Flamurtari ka fituar në “Loro Boriçi” 3 1 dhe konfirmohet edhe një herë tjetër si një nga skuadrat pretendente të këtij sezoni, ndërkohë që problemet tek skuadra shkodrane vazhdojnë të jenë të mëdha, ndonëse janë ndryshuar trajnerët në radhët e saj. Flamurtari e ka nisur ndeshjen në sulm.
Që në minutën e parë të ndeshjes lojtarët e saj kërkojnë golin, madje afrohen shumë afër pas goditjes së traversë nga Progni në minutën e 7 të. Vllaznia nga ana e saj, zgjodhet pas 10 minutave të para dhe hidhet në sulm. Bën një futboll të hapur dhe vërehet një dëshirë e madhe për të zhbllokuar sa më parë rezultatin. Fillon të krijojë raste dhe do të mbërrinim te goli i avantazhit. Sinani merr bukur një 11 metërsh, që shndërrohet në gol nga kolegu i tij i sulmit Jovanoviç. Kur dukej se ky gol do t’u jepte atyre qetësinë e administrimit të lojës dhe rezultatit, ndodh e kundërta.
Bëjnë disa gabime në pasimet e topave dhe nga një gabim i tillë, Daniel Xhafaj i vjedh bukur një 11 metërsh mbrojtësit Rajoviç. Edhe Sakaj është i saktë nga pika e bardhë dhe gjithçka baraspeshohet. Pas këtij goli është sërish Vllaznia që kërkon të shënojë, ndërkohë që Vajushi tregon se ka ende punë me golin. Ka dy mundësi të mira dhe nuk arrin të shënjestrojë siç duhet. Pjesa e parë mbyllet kësisoj në barazim 1 1. E dyta pritej të niste me të njëjtin ritëm për vendasit, por nuk ndodh kështu.
Janë lojtarët e Flamurtarit që përfitojnë nga një vendosje e gabuar e mbrojtjes vendase dhe kalojnë në avantazh me anë të Liçajt. Pësimi i këtij goli do t’i çorientonte tërësisht vendasit, të cilët hidhen në sulm për të kërkuar golin e barazimit, por janë tërësisht të paqartë. Gabojnë shumë në pasime, nuk kanë rrezikshmëri, madje janë miqtë ata që kanë mundësi të tjera për të shënuar sërish. Trajneri Josa kryen edhe dy zëvendësime të tjera, duke futur në lojë edhe Shtubinën e Hasanin, por asgjë nuk ndryshon.
Përkundrazi, mesfusha lë shumë për të dëshiruar dhe, si rrjedhojë, vjen edhe goli i tretë i miqve. Një humbje tepër dëshpëruese për shkodranët, të cilët duket se po kalojnë një krizë të thellë në këto momente. Duhet pritur ndoshta java që vjen që Josa të marrë fitoren e parë, teksa Vllaznia do të presë Elbasanin. Ndërsa Flamurtari në krye do të presë Skënderbeun, që është me pikë të barabarta me vlonjatët.
Deklarojnë…
Mirel Josa, trajner i Vllaznisë: “Nuk ishte e thënë që te Vllaznia të ndërroheshin trajnerët dhe të vinte fitorja. E kisha thënë këtë gjë edhe para ndeshjes. Problemi i kësaj skuadre nuk qëndron te sulmi, por te mesfusha dhe te mungesa e agresivitetit në lojë. Pa lënë mënjanë meritat e Flamurtarit, megjithatë, unë them se fitoren ia bëmë më të lehtë ne me gabimet tona. Edhe zëvendësimet që bëra në pjesën e dytë nuk sollën atë që prisja, përkundrazi, rendimenti lojës ra. Pavarësisht kësaj, besoj se gjendja e skuadrës do të ndryshojë.”
Gugash Magani, trajner i Flamurtarit: “Fituam përballë një kundërshtari të fortë. Më pëlqeu këmbëngulja e futbollistëve të mi, të cilët, ndonëse u gjendën në disavantazh, arritën të përmbysin rezultatin. Në pjesën e parë nuk luajtëm mirë, por gjërat ndryshuan. Lojtarët e kuptuan se duhej të tregonin vlerat e tyre edhe në transfertë. Eshtë akoma shpejt për të thënë se tashmë janë veçuar skuadrat pretendente, sepse një gabim kushton shumë. Do të shohim punën tonë dhe mendoj se jemi në rrugën e duhur.”
Të veçanta
- Në tribunën VIP të “Loro Boriçit”, krahas presidentëve Fushaj e Gjika, ka rënë në sy edhe ish ministri i sporteve, Bujar Leskaj, figurat e njohura të futbollit shkodran Zmijani e Jera dhe të tjerë.
- Tifozët në fillim të ndeshjes thirrën “Josa, Josa”, por në fund të takimit ishin tepër të dëshpëruar dhe e kishin të qartë se problemi i skuadrës së tyre nuk qëndron te trajneri.
- Në Shkodër vazhdojnë të mendojnë se luajtja e ndeshjeve të Vllaznisë me projektorë është ters dhe kështu në fakt ndodhi edhe mbrëmë, kur sërish ka humbur.