Fundi me fat për Skënderbeun, që merr kreun

Kësaj radhe ka qenë Vishaj deciziv, ndërsa nuk ka munguar tensioni gjatë dhe pas takimit
Laçi - Skënderbeu 0-1
Shënues: Vishaj 86′
Laçi: Vashaku, Doku, Buljan, Kaja, Kastrati (Karaxhiç 75′), Çavriç, Mustafaraj, Vucaj, Marashi (Mile 46′), Hysa, Selimi. Trajner: S.Nica.
Skënderbeu: Shehu, Dragusha, Vrapi, Bici, Ristovski, Fagu, Shkëmbi (Vishaj 69′), Biskup, Soza (Asllani 89′), Joliç (Markoviç 61′), Bërkiç: Trajner: Sh.Muça.
Gjyqtarë: L.Jemini, E.Biçaku (Tiranë), A.Guçe (Lushnjë)
Kartonë të verdhë: Doku, Selimi, Biskup, Bicaj, Kaja
Komenti
Ka marrë tri pikë të arta Skënderbeu në Laç, aty ku nuk fitonte prej një viti asnje ekip, pikërisht atëherë kur Shkëlqim Muça drejtonte Dinamon, ndërsa dje udhëhoqi drejt fitores korçarët. Ndoshta rastësi, por ja Muça është i vetmi që fiton dy herë rresht në Laç me ekipe të ndryshme. Tani Skënderbeu e sheh veten në vend të parë në renditje së bashku me Dinamon dhe Flamurtarin, që janë me pikë të barabarta, por blutë kanë një ndeshje më pak dhe nesër korçarët do të bëjnë tifozllëk për krutanët.
Ajo që duhet thënë është që ndeshja ka qenë shumë luftarake, me ritëm të kënaqshëm, me tension brenda, madje nuk kanë munguar edhe acarimet e tifozëve, që për pak nuk kanë degjeneruar në gjuajtje me sende të forta, edhe pse ndonjë është hedhur sporadikisht. Loja nis me sulme nga të dyja krahët, por laçianët me kalimin e minutave bëhen më kërkues dhe për disa momente bëjnë presion në portën e Shehut. Menjëherë fillojnë të organizohen korçarët dhe kundërsulmi fillon të funksionojë dhe rastin më të mirë e kanë miqtë, që madje shënojnë, por goli anulohet, pasi Bicaj, sipas gjyqtarit, ka bërë faull më parë se lojtari tjetër i Skënderbeut të shtynte topin në rrjetë. Loja fillon e bëhet më burrërore, më duele të ashpra dhe me goditje në portat respektive, por pa sjellë rrezik konkret për të dy portierët. Kështu përfundon pjesa e parë, pa gola.
E dyta nis me një ritëm akoma më të kënaqshëm. Vendësit bëhen më kërkues, e dinë se mund të fitojnë dhe fillojnë njëri pas tjetrit rastet, ku në disa prej tyre portieri Shehi është me fat që nuk pëson. Për të ardhur te momenti i acarimit të tifozëve dhe lojtarëve kurbinas. Shehi, teksa pret një top në vijën fundore, një lojtar i Laçit ndërhyn duke bërë faull, topi i shpëton portierit dhe përfundon në rrjetë pas një shtyrje tjetër të topit. Gjyqtari e anulon dhe vendësit fillojnë të protestojnë. Gjithsesi, loja vazhdon, por 5 minuta para se të mbaronte takimi, kur ndeshja po përfundonte në barazim, miqtë shënojnë. Laçianët përpiqen minutat e fundit të paktën të barazojnë, kur kujtojmë që u dhanë edhe 5 minuta shtesë. Kështu mbyllen takimi dhe korçarët e gdhijnë të parët në renditje sot.
Por Skënderbeu do të ketë një tjetër transfertë të vështirë, atë në Vlorë ndaj Flamurtarit, një rival në kuotë të barabartë pikësh. Një duel për të mos u humbur. Ndërsa Laçi do ta ketë sërish pisk, teksa do të ndeshet me kampionët në transfertë.
Deklarojnë…
Stavri Nica, trajner i Laçit: Nuk u prononcua pas takimit.
Shkëlqim Muça, trajner i Skënderbeut: “Ishte një ndeshje shumë e vështirë. E kishim parashikuar se Laçi është shumë i fortë në fushën e tij dhe për këtë ishim përgatitur. Mënyra si u zhvillua ndeshja ishin të pranishëm të tri rezultatet deri në fund të 90 minutave. Ne u munduam të shfrytëzonim rastet e krijuara, ku në tri raste që krijuam, arritëm që në një të shënojmë. Ekipi i Laçit, me lojën që zhvilloi, tregoi që është një ekip shumë i fortë dhe i vështirë për ta mundur.”

Korçarët: Laska goditi Ristovskin
Pas përfundimit të ndeshjes së djeshme në Laç, nga korçarët pretendohet se presidenti i Laçit, Pashk Laska, ka goditur maqedonasin e Skënderbeut, Borçe Ristovski, duke ushtruar dhunë mbi të dhe duke e goditur barbarisht në fytyrë. Pas këtij momenti, presidenti laçian nuk ngopet me kaq dhe lëshon fjalët më banale dhe ofendon trajnerin Shkëlqim Muça. Gjëja më e shëmtuar ka të bëjë me uniformat blu, pasi kanë qëndruar spektatorë, ndërkohë që më pas futbollisti Ristovski është çuar në një klinikë për t’u mjekuar.
Futbollistët e Skënderbeut kanë qëndruar më shumë se 1 orë të bllokuar dhe vetëm pasi është qetësuar disi situata të gjithë kanë dalë dhe i janë drejtuar autobusit, që duhet pranuar, më pas është shoqëruar nga policia deri në Vorë. “Në Laç gjithçka shkoi mirë për sa i përket ndeshjes, por duhet thënë se fundi ka qenë i turpshëm, pasi presidenti Laska ka goditur barbarisht futbollistin tonë Ristovski dhe ka përdorur një fjalor më shumë se banal ndaj trajnerit Muça. Klubi “Skënderbeu” i dënon këto akte të turpshme që ndodhën sot (dje) në Laç dhe kërkon nga FSHF-ja të dënojë sa më parë veprime të tilla të turpshme që po ndodhin në futbollin shqiptar,” - thotë drejtori teknik i Skënderbeut, Ilirjan Përmeti.