Fitojnë “të mëdhenjtë”, por jo Siti

Çelsi mposht Blekbërnin, Arsenali kalon Uest Hemin, ndërsa Mançester Siti humbi në Volverhempton
Çelsi përmbysi rezultatin dhe arriti të mundte Blekbërnin, ndërkohë që Arsenali gjithashtu mposhti Uest Hemin, por Mançester Siti u mund nga Volvesi. Fulhemi u kthye te fitorja duke mposhtur Uiganin, kurse Evertoni vazhdoi serinë e fitoreve duke mundur minimalisht Stok Sitin. Çelsi i Karlo Ançelotit u duk në telashe në “Ewood Park”, por reagoi mirë dhe fitoi 2 1 duke ruajtur avantazhin prej pesë pikësh në krye të renditjes.
Blekbërni e nisi mirë ndeshjen kundër kampionëve të Anglisë dhe shënoi golin e epërsisë pas 21 minutash lojë, kur Benxhani fitoi një duel ajror me Xhon Terrin dhe shënoi pas krosit të El Haxhi Diufit. Por ashtu siç kishte thënë edhe trajneri Ançeloti para ndeshjes, skuadra e tij do të dinte si të reagonte dhe në fakt arriti të barazonte para përfundimit të pjesës së parë me anë të Nikolas Anelkasë, që mori një pasim nga Didië Drogba. U duk se goli i fitores për Çelsin nuk do të vinte kurrë, por ishte Branislav Ivanoviç që shënoi pas aksionit të bukur të Juri Zhirkov.
Presioni - Arsenali vazhdon ta mbajë nën presion Çelsin kryesues pasi fitoi 1-0 kundër Uest Hemit, ndonëse kjo fitore ishte në dyshim deri në sekondën e fundit të ndeshjes. Arsenali në pjesën e parë luajti mirë, por nuk arriti të shënonte përballë Uest Hemit të mbledhur mirë në mbrojtje. Samir Nasri goditi shtyllën me një gjuajtje të fortë në pjesën e dytë, ndërkohë që Uollkot i shkoi fare pranë golit disa minuta më vonë. Andrei Arshavin apeloi për penallti, por arbitri nuk ishte i një mendimi me të. Portieri Robert
Grin bëri disa pritje të mira para se Aleks Song të shënonte golin e fitores pas krosimit të Gael Klishit kur kishin mbetur edhe dy minuta lojë. Mançester Siti nuk arriti ta merrte veten pas humbjes kundër Arsenalit javën që shkoi dhe u mund 2-1 nga Volvesi në stadiumin “Molineux”. Emanuel Adebajor, që ishte titullar, shënoi me penallti pas një faulli të Riçard Sterman ndaj David Silvës. Volvesi barazoi falë Nenad Miljas dhe më pas shënoi golin e fitores me Dejv Eduards. Siti tentoi të barazonte, por Volvesi ruajti epërsinë dhe mori një fitore të çmuar.
Inspirimi - Dy golat e shënuar nga Klint Dempsei i dhanë Fulhemit fitoren e dytë në Premier Ligë këtë sezon, teksa rimëkëmbja e Uiganit u ndërpre nga humbja 2-0 në “Craven Cottage”. Dempsei shënoi me kokë pas krosimit të Karlos Salsidos duke i dhënë Fulhemit epërsinë në minutën e 30-të, para se të shënonte sërish pas krosimit të Kris Beird pak para mbarimit të pjesës së parë. Stoku pësoi humbjen e tretë radhazi, ndërsa Evertoni e çoi në pesë numrin e ndeshjeve pa humbje, falë fitores 1 0 në “Goodison Park”. Skuadrat ishin në baraspeshë deri në momentin kur Jakubu Aijegbeni shënoi nga një kënd i pjerrët. Më parë ishte Tim Kahill që kishte goditur shtyllën.