Roubini: Italia rrezikon të përjashtohet nga Eurozona

Një nga ekonomistët më në zë të botë, Nouriel Roubin, tha për Reuters se paketa e emergjencës fiskale e ekonomisë së tretë në Eurozonë, ka shumë gjasa të dështojë në synimin për të ruajtur koston e borxhit në tregje në nivele të pranueshme. Bazuar në këtë skenar, Rubini parashikon që Italia të përballet me riskun e falimentit dhe daljes nga Eurozona në rast se nuk ndërmerr veprime më agresive. Nuriel Rubini është bërë i famshëm për shkak të parashikimit të krizës bankare të viteve 2008-09 dhe të recesionit global që pasoi atë. Parashikimet e drejta i dhanë pseudonimin "Doktor Mallkimi”.

Në intervistën për Reuters ai tha gjithashtu se Greqia, Portugalia dhe Spanja aktualisht përballen me rrezikun për t’u përjashtuar nga unioni monetar. "Besoj se në 12 muajt e ardhshëm ka shumë gjasa që “plani A për Italinë” të mos funksionojë. Edhe nën drejtimin e qeverisë së re reforma strukturore dhe shtrëngimi fiskal do të përkeqësojnë recesionin," tha Roubini. Ai cilësoi si një shaka të madhe Fondin e Stabilitetit Financiar në Europë, të krijuar në Qershorin e 2010 për të ndihmuar financiarisht vendet me probleme. Të njëjtin përcaktim qesharak ai bëri edhe për mekanizmin e veçantë brenda këtij fondi të propozuar në muajin e kaluar dhe që synon të rrisë vlerën e fondit në 1 trilion euro. Ndërsa për Fondin Monetar Ndërkombëtar, Rubini tha se mund të mos jetë në gjendje të japë ndihmën e nevojshme financiare "në një moment nëse do të bashkohen të gjitha paratë e Fondit Monetar Ndërkombëtar me paratë e Europës, ato nuk janë të mjaftueshme dhe tregjet janë duke pritur përdorimin e artilerisë së rëndë, për pasojë Italia do të detyrohet të realizojë ristrukturim të borxhit.

Madje ajo mund të detyrohet të largohet nga Eurozona," tha Roubini. Ai argumentoi se në momentin kur Italia të përjashtohet nga tregjet, do të jetë shumë e vështirë të rifitojë besimin e tregjeve. “Dhe nuk ka burime të mjaftueshme zyrtare për paratë sepse ka nevojë për të paktën 1 trilionë euro, dhe para reale, jo para fallco, jo para qesharake për të ndihmuar Italinë dhe Spanjën," tha Rubini. Ndërsa për Greqinë ai parashikon dalje të sigurt nga Eurozona në 12 deri 18 muajt e ardhshëm. Portugalia për Rubinin është në të njëjtin thes me Greqinë. Ai tha se këto dy ekonomi janë shumë të vogla dhe në rast se Eurozona mbron Italinë dhe Spanjën, largimi i Greqisë dhe Portugalisë në një formë gjysmë të çrregullt është një veprim i lehtë. Ndërsa largimi i Italisë apo Spanjës për Rubinin do të prodhojë shpërbërje të pashmangshme të Eurozonës.
Burimi: Scan-Tv