Komisioni i Ekonomisë miraton ligjin e ri të bankave

Komisioni i Ekonomisë miratoi pasditen e djeshme amendamentet e reja në ligjin për Bankat në Republikën e Shqipërisë. Ndryshimet kryesore që i janë bërë ligjit janë kthimi i bankës së huaj nga degë në filial, dhe krijimi i “bankës urë”, në rast se ndodhet në kushtet e falimentit.

Përsa i përket ndryshimit të parë, ajo parashikon se një bankë e huaj, e cila ushtron veprimtari në territorin e Shqipërisë nëpërmjet degës së saj, mund të shndërrojë degën e saj në një filial, në formën e shoqërisë aksionere nëpërmjet regjistrimit të kapitalit të dhuruar në aksione të nënshkruara nga banka e huaj.

Ndërkohë, ndryshimi i dytë i referohet sigurisë financiare të bankave ku parashikohet procesi i shkrirjes së bankës dhe krijimin e një subjekti të ri, të quajtur “bankë urë”, e cila ushtron funksione të njëjta si bankat e tjera të nivelit të dytë, por që administrohet tërësisht nga Banka e Shqipërisë.

Ky ndryshim në projektligj ka qenë edhe një kërkesë e Bashkimit Evropian, ku edhe aplikohet, për t’i paraprirë rreziqeve të mundshme që mund mund të prekin systemet bankare në kushtet e presionit ekonomik. Pas miratimit në Komisionin e Ekonomisë, këto ndryshime ligjore pritet të marrin votën parlamentare.
Burimi: Scan-Tv