IOM, ulen me 3 % dërgesat e emigrantëve

ROME-6 janar-(alblink)- Organizata
Ndërkombëtare e Emigracionit (IOM) ka publikuar këto ditë statistikat e
të ardhurave të emigrantëve për vitin 2009. Sipas këtyre të dhënave
emigrantët shqiptarë gjatë vitit 2009 kanë transferuar në Shqipëri më
pak para se në vitin 2008. Sipas Organizatës Ndërkombëtare të
Emigracionit 39% e emigrantëve shqiptarë konfirmojnë se dërgojnë para
në shtëpitë e tyre të paktën cdo gjashtë muaj, ndërsa 19 % e tyre
pohojnë se e bëjnë këtë gjë çdo tre muaj. Sipas statistikave të
sapopublikuara të IOM dërgesa e parave nga emigrantët shqiptarë është
zvogëluar gjatë vitit 2009 me 3% duke i krahasuar ato me vitin 2008 e
baraz me rreth 200 milionë euro. Gjatë viti 2009 të ardhurat e
emigrantëve në Shqipëri përbënin 9.6 % të prodhimit të përgjithshëm
bruto , ndërsa gjatë vitit 2008 përbënin 12.3 % të tij. Kjo rënie
gjithnjë sipas ekspertëve të IOM është pasojë e efekteve të krizës
ekonomike globale.