Financat: Pagat dhe shpërblimet në kohë

TIRANË – 17 dhjetor - Qeveria
do të paguajë të gjithë pagat dhe shpërblimet e fundvitit në kohë dhe
sipas ligjit. Ministria e Financave reagoi sot pas zërave për shtyrjen
e pagesave për pensionistët dhe buxhetorët. “Të gjitha pagesat për
pagat e pensionet do të shpërndahen sipas ligjit dhe nuk do të ketë
asnjë shtyrje pagese për në muajin Janar”, - thuhet në deklaratën e
këtij institucioni. Sipas saj, “Ministria e Financave do të paguajë
brenda muajit Dhjetor edhe te gjitha shpërblimet prej 1 miliard lekësh,
sipas vendimit të Këshillit të Ministrave, të miratuar më datë 16
dhjetor për punonjësit e administratës publike në masen 10 mijë dhe 15
mijë lekë.

Titullarët e këtij institucioni sqarojnë se brenda
muajit dhjetor do të kryehen pagesat për shumën 1.4 miliard lekë, sipas
vendimit të qeverisë për shpërblimin e të gjitha kategorive të
pensionistëve në shumën 2500 lekë për pension, përfshirë pensionet e
pleqërisë, familjare, të invaliditetit, ish-minatorët, ish -punonjësit
e industrisë ushtarake dhe të gjithë kategoritë e tjera me trajtim
pensioni të parakohshëm dhe trajtim të veçante financiar.

“Brenda
muajit dhjetor do të përfundojnë edhe të gjitha pagesat e prapambetura
prej 400 milion lekë për personat me aftësi të kufizuara dhe ata që
përfitojnë ndihmë ekonomike”, theksohet në njoftimin zyrtar. Ai sqaron
se “gjendja financiare e llogarisë të Thesarit mundeson respektimin dhe
zbatimin e plote të buxhetit të shtetit miratuar në Parlament”, duke
shtuar se “lajmet e shpërndara për pamundësi financiare të pagimit të
pensioneve, pagave dhe shpërblimeve të fundvitit, janë të rreme dhe
dashakeqe”. Prej disa ditësh opozita dhe mediat kanë njoftuar mungesën
e likuiditetit nga ana e qeverisë për të paguar shpërblimet dhe pagat
për nëpunësit e administratës publike gjatë këtij muaji.