Administrata dhe pensionistët, shpërblim për festa

TIRANE – 15 dhjetor :– Vetëm
administrata publike dhe pensionistët do të përfitojnë shpërblim për
festat e fundvitit. Ky është propozimi i bërë nga qeveria. Burimet
zyrtare bëjnë të ditur se kryeministri Berisha priti sot ministrin e
Financave z. Ridvan Bode, së bashku me përfaqësues të tjerë të kësaj
ministrie dhe drejtues të Institutit të Sigurimeve Shoqërore (ISSH).
“Në këtë takim, Kryeministri Berisha kërkoi që, pavarësisht nga
ndikimet e krizës globale, të merren masat që punonjësve të
Administratës Publike dhe 540 mijë pensionistëve të vendit të mund t’u
jepet një shpërblim fundviti, sado modest të jetë”.

“Përfaqësuesit
e ministrisë së Financave dhe të Institutit të Sigurimeve Shoqërore e
njohën Kryeministrin Berisha me vështirësitë e diktuara nga kriza për
realizimin e shpërblimit të këtij viti, por, nga ana tjetër, u mor
përsipër të shqyrtohen të gjitha mundësitë për realizimin e porosisë së
Kryeministrit”, - thonë burimet zyrtare të Këshillit të Ministrave.