Sali Berisha bleu Apple IPAD

Kryeministri Berisha tregoi sot në mbledhjen e grupit parlamentar të Partisë Demokratike “dhuntinë” e tij ndaj teknologjisë.
Duke mbajtur në duar një I-pad, prodhimi i fundit i gjigandit Apple,
kreu i qeverisë foli gjerësisht për mënyrën si u arrit deri tek
prodhimi i kësaj pajisje.
Një vit më parë, kryeministri Berisha përsëri në koherencë me
zhvillimet teknologjike, disa herë publikisht ka ekspozuar telefonin
celular BlackBerry, identik me aparatin që mbante në duar gjatë
fushatës presidenti amerikan Barack Obama.
Në mbledhjen e sotme të grupit parlamentar, veç çështjeve ekonomike, Berisha iu drejtua deputetëve duke thënë:

“Sot para jush dua të paraqes dy çështje të rëndësishme. Për njërën ju
mund të ndjeheni pak të çuditur, se vërtetë është e pazakontë, por
njeriu nuk mund të mos ndajë të mirën me të tjerët. Dhe ajo që unë dua
të ndaj me ju, është kënaqësia e Ipad. Ky është kompjuteri që unë kam
pritur prej 30 vitesh. Që ditën që në laboratorin ku punoja, ne arritëm
të sigurojmë një Apple 2, të Steve Jobs, dhe gjer këto ditë në kërkim
të një kompjuteri të tillë, jam përpjekur të siguroj dhe të blejë çdo
prodhim që shënonte hapa drejt tij. Dhe këtë e realizoi sërish Steve
Jobs. I bën njerëzimit një dhuratë të madhe shumë. Bill Gates, 5 vite
më parë, në një editorial të botuar në Herald Tribune, Nju Jork Times,
do të paralajmëronte se 5 vitet që vijnë, do të jenë vitet të cilat në
fushën e ICT do të sjellin më shumë se 25 vitet e shkuara. Në këtë
shkrim fondamental Gates paralajmëronte kompjuterin tablet. Por ëndrrën
e Gates dhe të gjithë atyre që pritën me padurim këtë kompjuter që ka
përmasat e faqes së një libri, i ka shkrirë në një. Iphone, ipod që
transformoi muzikën e botës me dixhitalizimin e saj dhe i dha mundësi
njerëzimit të ketë formën më të pastër të muzikës, të regjistruar në
formën më të pastër, i shtoi edhe laptopin. Natën që shumë prej jush
ndiqnin Interin me Barcelonën, unë ndiqja pasionin tim të vjetër. Mund
ta lija, por po familjarizohesha. Mund t’u them se nuk kam patur kurrë
në dorë një gjë më të mrekullueshme, më njerëzore, më miqësore, më të
sofistikuar se Ipad. Po bëj unë një reklamë tregtare për këtë prodhim
të Steve Jobs? Steve Jobs ka qenë idhulli im, për dy gjëra. E para i ka
dhënë njerëzimit kaq shumë dhe i dha edhe këtë; së dyti është një hero
i vërtetë në luftën kundër sëmundjes. Qëndresa e tij, është legjenda e
qëndresës së njeriut ndaj një sëmundje jo të mirë. Dhe kushdo që lexon
për të nuk mund të ketë tjetër veçse një admirim të pakufishëm. Kështu
që nuk ka të bëjë asgjë me aspektin tregtar, përveçse me vendimin tim
që një të mirë mund ta ndajë edhe bashkëpunëtorët dhe qytetarët e mi.
Kjo ishte çështja e parë që unë doja të paraqisja para jush.”