Eto’o: Kthehem te Barça, i lë 22.5 milionët e Anzhit

Barcelona është në kërkim të një sulmuesi me eksperiencë dhe vizita në Kazalunjë e të martës ka lënë hapësirë për një hipotezë të bujshme në lidhje me rikthimin e Samuel Eto'o.

Sulmuesi kamerunas i Anzhit, pasi nuk ka mundur dot të sigurojë kualifikimin në Ligën e Kampioneve me klubin rus, ka udhëtuar drejt Spanjës ku ka takuar disa nga ish-shokët e tij të ekipit.

Sipas thashethemeve që kanë filluar të qarkullojnë në mediat spanjolle, ish-bomberi i Interit është i gatshëm që të ulë edhe rrogën e tij marramendëses, vetëm për të veshur sërish fanellën katalanase.

Gjithsesi, vlen për t’u theksuar se bëhet fjalë për një hipotezë ende në fazë fillestare, që është përgënjeshtruar menjëherë nga klubi nënkampion i Spanjës.

Mësohet se Barcelona nuk ka ndër mend, të paktën për momentin, që të fillojë sulmin për Samuel Eto'o (sulmuesi u ka dhënë lamtumirën blaugranave në vitin 2009, kur u transferua në Milano, te zikaltrit).

Por ekzistojnë dy faktorë që të shtyjnë të mendosh për realizimin e kësaj goditjeje të bujshme merkatoje.

Fillimisht vlen për t’u përmendur marrëdhënia fantastike që Eto'o ka me ish-shokët e tij të skuadrës dhe e dyta, por jo më pak e rëndësishme, është largimi i Pep Guardiolës nga pankina e katalanasve.

Por sipas së përditshmes katalanase "El Mundo Deportivo", kamerunasi është gati të pranojë uljen e rrogës së tij prej 20 milionësh në sezon që e lidh me Anzhin e Makhakalës.