Reali “bllokon” Drenten, Barça pret Seviljen

Holandezit të Herkulesit ia pengon kontrata të luajë ndaj ish-ekipit. Sfidë e fortë për katalanasit
Rojston Drente ndoshta duhet të rrëmojë xhepat nëse do që të luajë për skuadrën Herkules sot në ndeshjen kundër Real Madridit kryesues. Reali e huazoi këtë mesfushor holandez te skuadra e qytetit Alikante për këtë sezon, por në kontratën e tij thuhet se ai nuk mund të luajë kundër Realit nëse Herkules nuk paguan 2 milionë euro. “Ndoshta unë jam i vetmi që duhet të paguaj për të luajtur”, ka thënë Drente për gazetën “Informacion”.
Drente me lojën e tij i ka bërë për vete tifozët e këtij klubi modest. “Unë jam duke u stërvitur me idenë se do të luaj”, ka thënë ai. Herkules, që ka buxhet vjetor prej 40 milionë eurosh, sa një e dhjeta e Real Madridit, e ka nisur mirë sezonin dhe është në vend të 13-të kur janë luajtur tetë ndeshje; ky vend i dedikohet edhe fitores 2-0 kundër Barcelonës në “Nou Kamp”.
Përgatitjet e tyre parasezonale u lanë në hije nga akuzat se ata kishin blerë ndeshje gjatë sezonit të shkuar. Megjithatë, Drente është i inspiruar sepse luan krahas sulmuesve David Trezege dhe Nelson Valdez dhe duket se mund të shmangin kthimin në kategorinë e dytë. Ndërkohë, Reali ka pas Barcelonën me një pikë më pak dhe në ndeshjet e fundit ka shënuar 16 gola, tetë prej të cilëve nga portugezi Kristiano Ronaldo.
Trajneri Hoze Mourinjo futi në fushë një formacion me pak titullarë kundër Murcias në ndeshjen e Kupës së Mbretit, që përfundoi 0-0, ndërkohë që sot pritet të luajnë sulmuesi Gonzalo Higuain dhe mesfushorët Mesut Ozil dhe Ksabi Alonso. Njëri prej lojtarëve më të mirë të Realit këtë sezon ka qenë mbrojtësi i majtë brazilian Marcelo, që duket se është përmirësuar shumë falë lojës së mirë në sezonet e fundit.
“Mourinjo më ka dhënë një mbështetje të madhe dhe kjo më ka ndihmuar”, ka thënë Marcelo në një konferencë për shtyp. “Ai më ka ndihmuar të përmirësohem në lojën time në mbrojtje dhe të jem më agresiv kur duhet, pasi nuk isha në lartësinë e duhur. Tani unë shkoj pas çdo topi si i çmendur.” Homologu i Mourinjos te Barça, Pep Guardiola, la pushim pjesën më të madhe të titullarëve në fitoren 2 0 në kupë kundër Keutas të martën, pasi kampionët presin Seviljen e vendit të gjashtë sonte.
Organizatori Ksavi, që nuk ka luajtur për shkak të dëmtimit te tendina e Akilit, ka shansin të luajë kundër andaluzianëve pas mungesës për disa javë. Vilareali i vendit të dytë, që ka golavarazh më të mirë se Barça, luan nesër kundër Sporting Gijonit. Valencia pret Real Saragozën sot, kurse Atletiko Madridi luan kundër Almerias nesër.