BB: Shqipëria, borxhin më të lartë publik në rajon

Shqipëria ka borxhin më të lartë publik krahasuar me vendet e tjera të Ballkanit Perëndimor. Ky konkluzion është publikuar në raportin e Bankës Botërore lidhur me zhvillimet ekonomike të Europës Juglindore. Vendet e rajonit të cilat u janë nënshtruar analizës, janë Shqipëria, Bosnja dhe Hercegovina, Kosova, Maqedonia, Mali i Zi dhe Serbia. Vendi ynë është afër nivelit të borxhit prej 60 përqind të Prodhimit të Brendshëm Bruto.

Krye-ekonomisti i Bankës Botërore për Ballkanin Perëndimor, Ron Hood, përmes një videokonference nga Beogradi, tha se "parashikimet tona për rritjen ekonomike në këtë rajon janë prej 2.5 përqind në vitin 2011 dhe 2.1 përqind në 2012". Ndër të tjera, në raportin e bërë publik nga Banka Botërore, thuhej se vendet kanë pasur progres në rritjen e PPB-së deri në vitin 2008 dhe se gjatë vitit 2009 e më tej është ndjerë rënie.

Në raport theksohet se borxhi i huaj për këto vende është rritur ndjeshëm, janë rritur kreditë me probleme dhe se janë dobësuar investimet e huaja direkte. Niveli i lartë i borxhit publik të Shqipërisë ka ngjallur debate edhe gjatë diskutimit të projektbuxhetit të vitit 2012, në Komisionin parlamentar të Ekonomisë. Përfaqësuesit e opozitës kanë kërkuar marrjen e masave për mbajtjen nën kontroll të deficitit buxhetor dhe borxhit publik, ndërsa qeveria ka dhënë garanci se ajo po e manaxhon në mënyrë efektive nivelin aktual të borxhit.
Burimi: Scan-Tv