NË ANKAND KONTRATA E THEMELIMIT TË APPLE

Kontratat e themelimit të Apple në vitin 1976, si dhe dokumenti i 11 ditëve më vonë që largon një prej partnerëve në biznes pritet që të shiten për të paktën 150 mijë dollarë në ankandin që do të zhvillojë Sotheby's. Ankandi është i përqendruar në dorëshkrime dhe në libra të rëndësishme historike.

Aty përfshihet letra e parë që një president amerikan i dërgon kongresit, një set skicash nga themeluesi i Playboy, Hugh Hefner si dhe një telegram i vitit 1912 që jep lajmin e mbytjes së Titanikut. Por dokumenti i themelimit të Apple pritet të tërheqë vëmendjen e koleksionuesve, pasi bëhet pak kohë pas vdekjes së Steve Jobs.

Kontrata, që themelon kompaninë Apple Computer, shprehet se Steve Jobs dhe Steve Wozniak secili do të marrë 45% të aksioneve të Apple's, ndërsa Ronald Wayne që përgatiti kontratën do të marrë 10%. Por në 11 ditë Wayne vendos të heqë dorë nga kompania dhe u pagua me 800 dollarë në dorë dhe 1 mijë e 550 dollarë pak kohë më vonë. Sot nëse nuk do të kishte hequr dorë 10% i pronësisë së tij do të përkthehej në 2 miliardë dollarë. Ky dokument u shit prej tij tek një koleksionist privat në vitin 1994.