Pas “braktisjes” nga Sinani, Seldi zgjedh Ronelën

Thashethemet më të fundit në shtyp, për “ndarjen” e Sinan Hoxhës dhe Seldi Qalliut, duket të kenë qenë të vërteta, pasi dyshja e këngëtarëve nuk po e vazhdojnë më traditën e të kënduarit së bashku në çdo koncert, brenda apo jashtë vendit.
Pasi Seldi Qalliu, të cilin e mbajmë mend nga pjesëmarrja në “Big Brother 3” mori pjesë i vetëm në “Kënga Magjike 2011” me këngën “Kno”, një incident i ndodhur në Suedi i vuri vulën marrëdhënies mes këngëtarëve. Seldi kishte shkuar të këndonte në Malmo të Suedisë së bashku me disa këngëtarë, mes së cilëve nuk gjendej Sinani, por kur organizatori thërriti në koncert edhe Sinanin, kërkesa e tij ishte që të mos këndonte atë mbrëmje edhe Seldi.
Dhe kështu ndodhi! Që prej asaj dite, me siguri relatat mes djemve të hiteve “Adrenalina” dhe “Biondina” janë acaruar, aq më tepër kur mësojmë se Seldi Qalliu dhe Ronela Hajati udhëtuan dje drejt Kosovës, për të kënduar së bashku në një disko. Kështu, këngëtari i ri i është përveshur punës dhe po kërkon sukses edhe pa Sinanin, ndërsa ka krijuar edhe një lidhje dashurore në distancë, me një vajzë që jeton në Suedi.
Mësohet se bashkë me të dhe Ronelën e hitit “Nela” gjendet edhe Enxhi Kamenica, gjithashtu ish-pjesëmarrëse në “Big Brother” si dhe e dashura e Stresit.