Berisha për aksidentin, kushte dhe rregulla të reja për udhëtimet e studentëve

Mbledhja e sotme e qeverisë ka nisur me një minutë heshtje për 13 viktimat e aksidentit të tragjik në Himarë. Kryeministri Berisha kërkoi një hetim të plotë dhe të gjithëanshëm për aksidentin e Himarës, ku humbën jetën 13 persona. "Aksidenti është në hetim dhe një hetim i plotë dhe i gjithëanshëm duhet të bëhet. Është e parakohshme të flitet në mënyrë përfundimtare për shkakun e tij, por ajo që ka një rëndësi kapitale është se ministritë e linjës, ministria e Brendshme, ajo e Transportit dhe e Arsimit duhet të merren me të gjithë këtë problematikë. Ne kemi rregulla të caktuara për udhëtimin e studentëve. Natyrisht fjalën për shkakun kryesor të këtij aksidenti do e japin ekspertët, prokuroria, policia rrugore, të gjitha institucionet që po merren me hetimin e tij", tha kryeministri Berisha. Kryeministri i kërkoi ministrive të linjës të shqyrtojnë marrjen e çdo mase për parandalimin e aksidenteve të tilla në vend. Në fjalën e tij shprehu edhe njëherë ngushëllimet për familjet e viktimave ndërsa iu uroi shërim të shpejtë të të gjithë të plagosurve.