Gjermania donatori më i madh i Shqipërisë për 2009-n

Eshtë shteti donator më i madh për Shqipërinë edhe për vitin 2009. Edhe
dje u firmosën disa marrëveshje financiare me vlerë 130 milionë euro
për realizimin e projekteve të tilla në sektorin energjetik dhe atë të
mbrojtjes së mjedisit. Gjermania vazhdon të mbështetësë financiarisht
Shqipërinë në marrëdhëniet dypalëshe në projektet për zhvillim. Gjatë
bashkëpunimit dypalësh gjermano - shqiptar, që nisi në vitin 1988 dhe
vazhdon deri më sot, Gjermania ka financuar projekte për zhvillimin në
Shqipëri me një fond prej 367 milionë eurosh. Financimi gjerman prej
130 milionë eurosh për vitin 2009, përbën shifrën më të madhe vjetore
gjatë 21 viteve të bashkëpunimit dypalësh gjermano- shqiptar në
projektet për zhvillim. Në një deklaratë zyrtare të ambasadës gjermane
theksohet se "nga ky fond prej 130 milionë eurosh, me mbi 90 milionë do
të financohen dy projekte në sektorin energjetikës: projekti i parë
"Linja unazore 110 kV në Shqipërinë e Jugut" me një shumë prej 49
milionë euro. Ndërsa i dyti është projekti rajonal "Linja 400 kV Tiranë
- Prishtinë", me një volum prej 42 milionë eurosh." Marrëveshjet
financiare përkatëse u nënshkruan të hënën (28.12)nga Ute Rodrian,
drejtore e Zyrës së KfW-së (Banka Kredituese për Zhvillim)dhe nga
Ministri i Financave, Ridvan Bode, në prani të Ambasadorit gjerman në
Tirane, Bernd Borchardt. Po të hënën (28.12)në Tiranë mes Gjermanisë
dhe Shqipërisë në Ministrinë e Punëve Publike, Transportit dhe
Telekomunikacionit u nënshkrua marrëveshja për bashkëpunimin financiar
për projektin "Programi i mbrojtjes së mjedisit Liqeni i Ohrit –
Pastrimi i ujrave të zeza Pogradec II", që kap shumën prej 800.000
eurosh. Financimet e Gjermanisë në projektet e zhvillimit e radhisin
Shqipërinë në grupin e vendeve të para për frymë të popullsisë, që
marrin asistencë gjermane.

Ne foto, ambasadori i Republikes se Gjermanise, i akredituar ne Tirane, Bernd Borchardt