Makina që drejtohet me anë të syve

Në Gjermani shkencëtarët thonë se kanë zhvilluar teknologjinë me të
cilën drejtuesi i një automjeti mund ta drejtojë atë nga vendi i
pasagjerit, pa prekur timonin dhe vetëm me anë të shikimit.

Raul Rohas, kërkues në fushën e inteligjencës artificiale në
Universitetin e Berlinit, ka thënë se kjo teknologji e re komandon
makinën bazuar në lëvizjen e syve të shoferit. Makina e cila quhet
“Dogde caravan” është testuar fillimisht në ish-aeroportin e Berlinit.

Pasi është montuar i gjithë sistemi elektronik i komandimit, dhe
personi i vetëm që ndodhet në makinë është ulur në vendin e parë të
pasagjerit, rrjeti elektronik u vu në punë. Rezultati ishte lëvizja e
timonit sikur të ishte prekur nga duar imagjinare, makina drejtohej
varësisht nga drejtimet ku shikonte pasagjeri në vendin e parë.

Kjo teknologji e quajtur “eyeDriver”, mundëson drejtimin e mjetit me
një shpejtësi deri në 50 kilometra në orë. Në raste të caktuara kur
personi mund të shikojë jashtë rrugës apo vëmendja e tij të tërhiqet
nga diçka tjetër, përshembull një vajzë e bukur që kalon në trotuar,
shkencëtarët thanë se automjeti është i pajisur me një zgjidhje edhe
për këtë. Zgjidhja është sistemi GPS i montuar në makinë së bashku me
një set kamerash dhe vëzhguesish lazer që nuk lejojnë lëvizjen e
makinës “në korsi të gabuar”.